Нови наслови

И покрај своето сиромашно потекло, Томаш Јудум, благодарение на среќните околности и неговата напорна работа, успева да стане лекар, водејќи се од една единствена премиса – помош на сиромашните. Млад, храбар, борбен, решителен, истраен, етичен, желен за правење добрини, тој се обидува да ја промени реалноста околу него.... За време на една прошетка ја среќава Јоана, убава учителка, во која се вљубува, но и таа не останува рамнодушна.... дали Томаш ја продолжува својата борба против неправедноста и злото со кои е опкружен или, пак, љубовта кон Јоана го одвраќа од идејата да се бори против сите...

Ганди или попознат како Махатма, што на санскрит значи голема душа , великодушен, е човекот што ја поведе по ненасилен пат Индија кон својата независност и на свој начин го промени човештвото преку неговите силни пораки.

Неговите пораки најдобро зборуваат за него:

„Човекот е производ на своите мисли, она што го мисли, тоа и станува.“

„Мора да бидете промената што сакате да ја видите во светот.“

„Не смеете да ја загубите вербата во човештвото. Човештвото е океан; ако неколку капки во океанот се нечисти, океанот нема да стане валкан.“

„Пет ќошиња“ на перуанскиот автор Марио Варгас Љоса е приказна за светот кој опстојува под закана од цинизмот, амбицијата, моралната беда и насилството. За време на корумпираното владеење на Алберто Фуџимори и стравот од тероризмот на „Сендеро луминосо“ и жолтиот печат, две пријателки од богатата класа неочекувано се впуштаат во вознемирувачки вител на еротски авантури и политички уцени.

Иронична и непредвидлива, оваа приказна одеднаш се трансформира во еден вид панорама на перуанското општество од деведесеттите години и трилер кој ја опишува вулгарноста на слободата во корумпираниот систем.

Професорот е првиот роман на Шарлот Бронте, напишан под псевдонимот Карер Бел. Тој е напишан пред нејзиното најпознато дело Џејн Ер, но издавачите упорно одбивале да го печатат, затоа е објавен дури во 1857 година, по нејзината смрт.

Во книгата се зборува за животот на младиот професор Вилијам Кримсфорт, за неговото детство, семејната трагедија, неговата професија како професор во училиштето за девојки во Брисел и за неговите љубовни авантури.

Романот е инспириран од настаните и од личното искуство на Шарлот Бронте во Брисел, каде што студирала странски јазици во 1842 година во интернатот воден од Константин Хегер и од неговата сопруга Клер Зое.

Замислете да можете на Бога да му ги поставите најмистериозните прашања и претпоставете дека Бог ви дал разбирливи и јасни одговори. Тоа му се случило на Нил Доналд Волш. А може да ви се случи и вам. Подгответе се за еден необичен разговор што ќе ви го смени животот!

Во еден тежок период од својот живот, Волш напишал луто писмо до Бога, прашувајќи го зошто животот му е неуспешен на сите полиња. И потоа слушнал глас: „Дали навистина сакаш одговор на сите овие прашања?“ Волш почувствувал дека одговорите му проблеснуваат во свеста и одлучил да ги запише. Дијалогот што следувал е книгата што ја држите в раце.

Таа дава одговори на прашањата што сите ние си ги поставуваме: за животот и љубовта, меѓучовечките односи, доброто и злото, вината и гревот, простувањето и спасението, рајот и пеколот... Отворено зборува за моќта, парите, сексот, децата, бракот, разводот, здравјето, животното дело, иднината, минатото, сегашноста... Ги истражува војната и мирот, земањето и давањето, видливото и невидливото, вистината и лагата, конкретното и апстрактното...

Понекогаш се појавува книга чија длабока мудрост од корен ќе ве смени. Разговори со Бога од Нил Доналд Волш е токму таква книга. Ќе ви помогне да се сетите кои сте навистина, зошто сте тука и која е повозвишената цел на животот. Ќе ви овозможи длабоко духовно будење и ќе го означи почетокот на едно посебно патување за духовен развој и проширување на свеста.

Оваа ведра книга, во исто време, во својата интимна текстура, сведочи и за балканскиот трагизам. Авторот не ни зборува само како албански бегалец, емигрант, екс Југословен, македонски државјанин, туку сведочи и како балкански човек, живеејќи и носејќи ги во себе судбините на толку многу поврзани, мешани, делени, противставувани култури... Едгар Морен

Граница е шеснаесеттиот роман од Балканската сага на Луан Старова (Татковите книги, Времето на козите, Атеистички музеј, Пресадена земја, Балкански клуч, Патот на јагулите, Тврдина од пепел, Ервехе – книга за една мајка, Во потрага по Елен Лејбовиц, Љубовта на генералот, Амбасади, Нови амбасади, Балканвавилонци, Балкански жртвен јарец и Враќањето на козите). Француската книжевна критика овие романи ги вбројува во редот на големите европски романи.

Границата е релативно нова идеја на Балканот. Нараторот во неколку големи поглавја раскажува еден век граница преку доминантните ликови и нивните разгранувања во светот во текот на XX век: Дедото, Бабата, Таткото, Мајката и самиот раскажувач. Со својата нарација, како и со оригиналните фотографии, оваа книга е значајна книжевна творба за балканските граници, за нивната вплетеност во судбината на луѓето.